PIANEFFORTE ‘E NOTTE

Nu pianefforte ‘e notte
Sona lontanamente
E ‘a musica se sente
Pe ll’aria suspirà.

E’ ll’una: dorme ‘o vico
Ncopp’a sta nonna nonna
‘e nu mutivo antico
‘e tanto tempo fa.

Dio, quanta stelle cielo!
Che luna! E c’aria doce!
Quanto na bella voce
Vurria sentì cantà!

Ma solitario e lento
More ‘o mutivo antico;
se fa cchiù cupo o vico
dint’a all’oscurità.

Ll’anema mia surtanto
rummane a sta funesta.
Aspetta ancora. E resta,
ncantannose, a penzà.

MARZO

Marzo: nu poco chiove
e n’ato ppoco stracqua
torna a chiovere, schiove,
ride ‘o sole cu ll’acqua.

Mo nu cielo celeste,
mo n’aria cupa e nera,
mo d’’o vierno ‘e tempesta,
mo n’aria ‘e Primmavera.

N’ auciello freddigliuso
aspetta ch’esce ‘o sole,
ncopp’’o tturreno nfuso
suspireno ‘e vviole.
 
Catarì!…Che vuo’ cchiù?
Ntiénneme, core mio!
Marzo, tu ‘o ssaie, si’ tu,
e st’ auciello songo io.

ERA DE MAGGIO

Era de maggio e te caréano 'nzino,
a schiocche a schiocche, li ccerase rosse...
Fresca era ll'aria...e tutto lu ciardino
addurava de rose a ciento passe...

Era de maggio, io no, nun mme ne scordo,
na canzone cantávamo a doje voce...
Cchiù tiempo passa e cchiù mme n'allicordo,
fresca era ll'aria e la canzona doce...

E diceva: Core, core!
core mio, luntano vaje,
tu mme lasse, io conto ll'ore...
chisà quanno turnarraje!

Rispunnevo: Turnarraggio
quanno tornano li rrose...
si stu sciore torna a maggio,
pure a maggio io stóngo ccá.

Si stu sciore torna a maggio,
pure a maggio io stóngo ccá.

E só' turnato e mo, comm'a na vota,
cantammo 'nzieme lu mutivo antico;
passa lu tiempo e lu munno s'avota,
ma 'ammore vero no, nun vota vico...

De te, bellezza mia, mme 'nnammuraje,
si t'allicuorde, 'nnanz'a la funtana:
Ll'acqua, llá dinto, nun se sécca maje,
e ferita d'ammore nun se sana...

Nun se sana: ca sanata,
si se fosse, gioja mia,
'mmiez'a st'aria 'mbarzamata,
a guardarte io nun starría!

E te dico: Core, core!
core mio, turnato io só'...
Torna maggio e torna 'ammore:
fa' de me chello che vuó'!

Torna maggio e torna 'ammore:
fa' de me chello che vuó'!

'E ttrezze 'e Carulina

Versi di S. D. Giacomo  - Musica di Gambardella

I

Oi pètteno, che pièttene

'e ttrezze 'e Carulina,

dammenu sfizio, scippala, scipplala na matina.

E tu, specchio, addò luceno

chill'uocchie,addò, cantanna,

ride e se mmira - appànnete

quanto sesta ammiranno!

Lenzole, addò se stènneno

'e ccarne soie gentile,

sfucàteve, pugnitel,

tutto stu mese "Abbrile"!

E vuie, teste d'anepeta,

d'aruta e di resedà,

seccate ncopp'mall'asteco

faciteve truvà...

II

Mo 'o petteno, che pettena

'e trezze 'e Carulina,

è sempre 'o stesspo petteno

è tartaruga fina;

'0 specchio è de Venezia

e non ha fatto mossa;

'e llenzulelle smoveno

n'addre 'e spicaddossa...

E manco nun me sentonno 

ll'aruta e 'a resedaà:

cchiù ampresso, 'ncoppa ll'asteco,

Abbrile 'e ffa schiuppa!...

E sti scungiure - è inutile -

nnì a pommo cchiù arriva:

cchiù nfama e cchiuùsempatica

cchiù bella assaie se fa!

Palomma 'e notte

(Di Giacomo - Buongiorno)

I

Tiene mente 'sta palomma

comme gira comm'a vota,

comme torna n'ata vota

'sta ceroggena a tentà!

Palummè, chisto è nu lume

nun è rosa o giersumino...

e tu a fforza ccà vvicino

te vuò mettere a vulà!

Ritornello:

Vattenne ' a lloco!

Vattenne, pazzarella!

Va', palummella - e torna,

e torna a st'aria

accussì fresca e bella!...

O bbì ca 'i pure

mm'abbaglio chianu chiano,

e cca mm'abbruscio 'a mano

pe' te ne vulè caccia?...

 II

Carulì, pe' nu capriccio,

tu vuò fa' scuntento a n'ato,

e po' quanno l'he lassato

tu addu n'ato vuò vulà.

Troppe core stai strignenno

cu' sti mmne piccerelle;

ma fernisce ca sti scelle

pure tu te può abbruscià!

Ritornello

III

Torna, va' palomma 'e notte

dint'a ll'ombra addò sì' nata,

torna a st'aria 'mbarzamata

ca te sape cunzulà.

Dint'o scuro, e pe 'mme sulo,

'sta cannela arde e se struie ...

ma c'ardesse a tutt'e duie

nun 'o ppozzo suppurtà!

SAFFO

CATULLO

LIRICA MEDIEVALE

GIUSEPPE PARINI

GIACOMO LEOPARDI

CORRADO GOVONI

SALVATORE QUASIMODO

JACQUES PREVERT

BERTOLT BRECHT

EMILY DICKINSON

FEDERICO GARCIA LORCA